தொடர் தோல்விகளால், இலக்கு நோக்கி நகர இயலா செயல்பாடுகளால் ஏற்படும் உள அயர்ச்சியில் இருந்து மீண்டு நம்மை நாமே புதுப்பித்துக் கொண்டு அடுத்த நிலைக்கு நகர வைப்பதில் நம்பிக்கை நூல்களுக்கு மிகப்பெரிய பங்கு உண்டு. அகத்தில் குறையும் நம்பிக்கையை புறத்தில் இருந்து தரும் பூஸ்டர்களாக அவைகள் இருக்கின்றன. அதனாலயே நம்பிக்கை நூல்கள் விற்பனையில் சக்கை போடு போடுகின்றன. ஒவ்வொருவருக்கும் ஏதோ ஒரு கட்டத்தில் தேவையாக இருக்கின்ற நம்பிக்கையை நம் ஆன்மிகம் சார்ந்தும், அறவுரைகள் மூலமும் மனதில் அழுத்தமாய் பதிய தருவதில் சுகி. சிவம் அவர்களின் எழுத்தும், பேச்சும் எப்பொழுதும் முன்னேராய் நகர்பவை எனலாம். அந்த வாசக நம்பிக்கைக்கு இன்னொரு மகுடத்தை சூட்டும் வகையில் கவிதா பதிப்பகம் வெளியிட்டிருக்கும் சொல்வேந்தரின் நூல் ”கனவு மெய்ப்படும்”. இந்த தலைப்பே உள் நுழைவதற்கான ஆவலைத் தருகிறது.
