எதார்த்தம்

தன் எச்சத்திற்குள்

ஒரு விருட்சத்தின் உயிரை

அடைத்துத் திரியும்

பறவைகள் அறிந்திருக்குமா?

தானும் ஒரு விவசாயி

என்கிற எதார்த்த உண்மையை.

நன்றி : நந்தலாலா

உருமாற்றம்

கல்லை
வடிவமாக்கினான் 

சிலையாய்

சிலையை
உருமாற்றினான் 

தெய்வமாய்

தெய்வத்தை
குளிர்வித்தான் 

வழிபாடாய்

வழிபாட்டை

காசாக்கினான் 

வயிற்றுப்பசிக்காய்.

நன்றி : முத்துக்கமலம்

இயலாமைக்கோர் நன்றி

உன் வருங்கால கணவனிடம்
என்னை  உன் சினேகிதனாய்
அறிமுகப்படுத்திய
அந்த நொடியில்
நன்றி கூறிக்கொண்டேன்.

உன்னை காதலித்த
உண்மையை
உன்னிடம் சொல்ல விடாமல்
ஊனமாக்கிய என் இயலாமைக்கு!

மலர்ந்து நகர்தல்

நட்பில் நகரும்
நகர வாழ்க்கை

உறவில் மலரும்
கிராம வாழ்க்கை

உலர்ந்தும் உலராத
ஊன வாழ்க்கையில்

சிலருக்கு மட்டுமே
சாத்தியமாகிறது
மலர்ந்து நகர்தல்.

குறிப்பேட்டின் குறிப்புகள்

அதிர்வுதரும் கணம் அசாத்தியமாய்

தலையை உள்ளிழுக்கும் ஆமையாய்

உன் விருப்பத்தை

தன்னில் வலுவானதை தடம் மாறாது

இருப்பிடம் சேர்க்கும் எறும்பாய்

உன் சூதனத்தை

கடைசிப் புணர்வை பகலிடம் பகிர்ந்து

இரவை பிரசவிக்கும் அந்த நிமிடமாய்

உன் கோபத்தை

சாவுச்செய்தியோடு வாசல் தட்டி

தலை கவிழ்ந்து நிற்கும் வெட்டியானாய்

உன் மறுப்பை

நசிந்து கிடந்தேனும் பூரான்காலாய் விரவி

செடியை உயர்த்தி நிறுத்தும் வேர்களென

உன் ஆசையை

அடக்க முடியா வேட்கைக்குப் பின்

வீசியெறியப்பட்ட சதைத்துண்டாய்

உன் சந்தோசத்தை

பதிந்து வைத்திருக்கும் அதே குறிப்பேடு

தன் கடைசிப் பக்கத்தில்

குறித்து வைத்திருக்கிறது

நீயும்,நானும்

நிரந்தரமாய் விலகிச் செல்வதற்காய்

சந்திக்க வேண்டிய தினத்தையும்.

நன்றி : அதீதம்

உபதேசம்

தன்னை இழந்தும்

தன்னையே எரித்தும்

விளக்கிற்கு ஒளி பாய்ச்சுகிறது

எண்ணெய்யும் திரியும்.

ஆனாலும் –

உபதேசிக்கின்றோம்

”ஒளி தரும் விளக்காய் இரு” என்று!

நன்றி : முத்துக்கமலம்