Tuesday, 24 November 2015

தனக்கான வாழ்விடம்


இழைவதற்குள் அதன் இருப்பிடத்தை
இடம் மாற்ற வேண்டுமென
அங்கலாய்த்தார் அப்பா.

கொஞ்ச நாளில்
அதுவே இடம் பெயருமென
அன்பு காட்டினாள் அம்மா.

எத்தனைக் குஞ்சுகள் வருமென
கணக்குப் போட்டு
காத்திருந்தாள் தங்கை.

பகல் நேரக் கீச்சுகளால்
தொந்தரவாய் போயிற்றென
எரிச்சலடைந்தான் அண்ணன்.

எதிர்ப்புகளுக்கும்
எதிர்பார்ப்புகளுக்கும் மத்தியில்
தனக்கான வாழ்விடத்தை
உறுதி செய்யத் துவங்கியிருந்தது அந்தக்குருவி!

நன்றி : நந்தலாலா.காம்